موضوع: وصفات شهية وصحية للاطفال الإثنين يناير 21 2008, 12:51
حبيت انقل لكم وصفات لأطفالكم ترجمتها من كتاب امريكي ..سياسة مؤلفة هالكتاب انها تدخل الخضروات والفواكه بكل الاكل اللي تعطيه لأطفالها ..طبعا تعرفون اطفالنا اذا حطيتوا لهم خضره او فواكه مايحبونها ماراح ياكلونها فالافضل ان ندس هالخضروات بطريقه بدون مايدري الطفل. هي تصنع هالاكل ببيتها وتعده لأطفالها بصراحه انا وايد عجبني ..حتى اكلاتها لذيذه ..والأهم ان عيالي يحبونه
أول شي شلون تجهزون هالخضروات والفواكه !!
يعني مثلا الاكله اذا يحتاج لها زهره (قرنبيط): تاخذين الزهره تطبخينها بأي طريقه تحبينها هي تفضل انها تنطبخ عالبخار لمدة 8 الى 10 دقايق وتخلينه يبرد شوي وبعدين تخلطين بالخلاط (البلاندر ) فبيصير مثل الكريمه تقسمين الخليط في اكياس وتكتبين على الكيس التاريخ وتحفظينه بالثلاجه لمدة اسبوع او بالفريزر لأكثر من شهر ..(انا حطيت كل نص كوب في كيس بروحه ) او تقدرين تثلجينهم بقوالب الثلج
ونفس الطريقه لباقي الخضروات والفواكه البروكلي (الزهره الخضراء) : نفس طريقة القرنبيط الشمندر والبطاطا الحلوه: ينلفون بقصدير ويشوى بالفرن لمدة ساعه ويقشر ويخلط بالخلاط ويكيس القرع العسلي:يقشر وتزال الحبوب ويشوى بالفرن وبعدين بالخلاط ويكيس الافوكادو : يقسم الى النصف وتزال البذره وتقشر وتهرس بالشوكه وبعدين بالخلاط وقبل لا تثلجيينه تطلعين الهوا من الكيس. الجزر: يقشر ويقطع ويطبخ بالبخار 10 الى 12 دقيقه ويخلط بالخلاط السبانخ: تنظف وتغسل اوراق السبانخ ويطبخ عالبخار لمدة 30 الى 40 ثانيه او يطبخ في مقلاه مع ملعقه واحده من الماء لمدة 90 ثانيه. ثم يخلط بالخلاط ويكيس البازيلا: لا تهرسين البازيلا المجمده ولا تجمدينها مره ثانيه فقط ككل مااحتجتي ذوبي الثلج منها واطبخيها دقيقتين واهرسيها ..اما الطازجه ممكن انج تحضرينها من قبل وتجمدينها بنفس الطريقه اما الفواكه فما تحتاج للطبخ ..بالخلاط على طووول
الحين بهالمكونات انتي ضمنتي انج تحضرين لطفلج اي طبق بشكل صحي وشهي
نجي الحين للوجبات
وجبة الفطور
التوست الفرنسي (مع الموز او الاناناس او البطاطا الحلوه أو القرع او الجزر أو القرع العسلي ) اختاري اي فاكهه يحبها طفلج
المقادير : 4 بيضات كبيره 2 ملاعق كبيره مهروس اناناس أو بطاطا حلوه أو جزر أو قرع عسلي أو قرع معلب او موز ربع ملعقه صغيره دارسين(قرفه) 4 شرايح خبز سلايس بالقمح الكامل او التوست البني زيت بخاخ للطبخ 2 ملعقه صغيره مارجرين (fat free) شراب القيقب <-- شراب مثل العسل يحطونه الامريكان على البانكيك ممكن تستخدمين بداله العسل او تستبدلينه بالسكر البودره او الفواكه المشكله المقطعه مكعبات للتزين عالوجه بذور الكتان (اختياري)
الطريقه : في مله كبيره (طاسه)اخفقي البيض مع مهروس اي فاكهه اخترتيها مع الدارسين وبعدين غمسي السلايس في الخليط لمدة 30 ثانيه الى دقيقه لكل قطعه .لكن مب أكثر من دقيقه جيبي مقلاه رشي عليها الزيت وعلى نار وسط الى عاليه ضيفي المارجرين حطي قطعة السلايس على المقلاه انثري عليها بذور الكتان اذا حبيتي وحمري السلايس لين يصير السطح لونه ذهبي بياخذ منك 2 الى 3 دقايق لكل جهه قدمي السلايس وهو دافئ ومزين بالشراب او السكر البودر او الفواكه يقدم هذا الطبق مع كوب الحليب وبالهنا والشفا
اذا لقيت تفاعل حلو بكمل باقي الاطباق عندي اكلات أحلى وألذ تقدمينها لطفلج وقت العصريه او كعشا خفيف او فطور للصباح
موضوع: وصفات شهية وصحية للاطفال 
الإثنين يناير 21 2008, 12:51
